අධිවේගී පාරේ ලංගම
බස්‌ ධාවනය අද ඇරැඹෙයි
අකිත පෙරේරා

දක්‍ෂිණ ලංකා අධිවේගී මාර්ගයේ ලංගම බස්‌ ධාවනය අද සිට (03 වැනිදා) ආරම්භ කෙරේ. ඒ අනුව මහරගම සිට ගාල්ල දක්‌වා මෙම අධි සුඛෝපභෝගී බස්‌ රථ සේවාව ක්‍රියාත්මක වන අතර ඊට අය කෙරෙන ගාස්‌තුව රුපියල් 400 යි. කොට්‌ටාව සිට ගාල්ල දක්‌වා ගාස්‌තුව රුපියල් 380 ක්‌ බව ද ලංගම සභාපති එම්. ඩී. බන්දුසේන මහතා "දිවයින" ට පැවසීය.

ප්‍රථමයෙන් මේ සඳහා සුඛෝපභෝගී බස්‌ රථ දෙකක්‌ යෙදෙවෙයි. එහි රියෑදුරන් සඳහා විශේෂ පුහුණුවක්‌ ලබාදුන් බව ද හෙතෙම කීය.

ආසන 42 කින් සහ රූපවාහිනියකින් ද සමන්විත මෙම බස්‌ රථ තුළ අසුන්ගෙන ආසන පටි භාවිත කිරීම අනිවාර්ය වන අතර මහරගමින් උදේ 6.00, 08.00, 10.00, 12.30, 2.30 සහ සවස 4.45 යන වේලාවන්හිදී ද බස්‌ ගමනාගමනය ආරම්භ කෙරෙනු ඇත.

ගාල්ලෙන්ද එම වේලාවන්ට බස්‌ ගමනාගමනය සිදුකෙරෙන අතර මහරගමට පැමිණෙන මගීන්ට කොළඹ කොටුව බලා පැමිණීමට ද විශේෂ බස්‌ රථ යොදවන බව ද සභාපතිවරයා කීය.

අධිවේගී මාර්ගයේ මගී ප්‍රවාහන සේවා ආරම්භ කිරීමට ප්‍රථමයෙන් ප්‍රවාහන ඇමැති කුමාර වෙල්ගම මහතාගේ ප්‍රධානත්වයෙන් උත්සවයක්‌ ද පැවැත්වීමට නියමිතය.